Si Bong Revilla sa mata ng isang McDonald's telephone operator

(Nangyari noong Oct 15, 2008)

Nang abutin kami ng bukang-liwayway sa mansyon ng aking kaklaseng si Don Miggy Reyes, dahil sa kaka-shoot at kaka-edit ng mga videos na gagamitin para sa aming sports magazine program, napagdesisyunan ng aking mga kagrupo, na noo'y nagririgudon na ang mga tiyan, na umorder na ng almusal sa McDonald's.

Pagkatapos kong ilista ang mga order ng aking mga ka-Team Ball (Timbol), ay tumawag na ako sa 8-McDo gamit ang burgis na wireless phone ng Familia Reyes. Siyam na beses nag-ring ang kabilang linya bago ito sinagot ng isang babaeng telephone operator, na wari ko ay adik sa Chin Chun Su.

Operator: Hi good morning, this is McDonald's delivery!
Ako: O-order po ako ng breakfast meals. Meron na ba?
Operator: Yes sir, meron na po! Can I take your name please?
Ako: Allan
Operator: YES SIR ALLAN! Can I take your number please?
Ako: 0915*******
Operator: Let me repeat that. It's 0-9-1-5-*-*-*-*-*-*-*?
Ako: Opo
Operator: Your address naman po sir?
Ako: #1 Bongavilla (ganito talaga 'yung spelling sa karatula) Street, Project 6, Quezon City.
Operator: Saan po malapit 'yan?
Ako: Malapit 'to sa Trinoma. Along Mindanao Avenue.
Operator: Sandali lang sir, iche-check ko muna kung anong branch malapit diyan.

(Pagkatapos ng ilang sandali)

Operator: Hello sir, OK na po. Repeat ko lang po yung address niyo. It's #1 Bong Revilla St...
Ako: Bongavilla po.
Operator: Ah, Bong Revilla!
Ako: Hindi po. BONGA-VILLA.
Operator: Bong Revilla?! Ito po ba 'yung bayani?
Ako: Ha? Hindi nga Bong Revilla! Bongavilla -- B-O-N-G-A-V-I-L-L-A!
Operator: AAAAAAH! BONGAVILLA! YUNG BULAKLAK!
Ako: Oo!
Operator: HAHAHAHAHA! Sorry sir! So it's #1 Bongavilla St. Project 6, Quezon City.
Ako: Oo.
Operator: Kunin ko na po 'yung order niyo sir.
Ako: Anim na longganisa with rice at hot chocolate....
Operator: Anim na longganisa with riiiiiiice, saka hot chakleyt?
Ako: Oo, hot chocolate.
Operator: Yes sir, hot chakleyt nga po.
Ako: Okay, sige na.

(Pagkatapos kong ibigay ang mga order)

Operator: Sir that would be 1,246 pesos. How much po ang ibabayad niyo?
Ako: Siguro 1,300 pesos.
Operator: Would like to have your change sir?
Ako: Sana.
Operator: HAHAHAHAHA! Okay sir your order will arrive after 30 to 45 minutes. Thank you!
Ako: Salamat!

***

  Bong Revilla, bayani.

Kupalaran

Homework ko 'to para sa klase ni Sir Atalia. Pinagawa niya kami ng horoscope para malaman niya kung pwede na raw kaming manloko ng mga taong nagbabasa ng tabloid. Hehe!

Syempre, bago ako nagsulat ng sarili kong horoscope, pinag-aralan ko muna ang pag-iinterpret ng mga posisyon ng mga planeta, mga bituin at kung anu-ano pang heavenly bodies para masigurado kong accurate ang aking mga readings.

Heto na ang inyong mga kupalaran para sa araw na 'to--o kung anong araw mo man mababasa 'to:

Aquarius

Isang mahal sa buhay ang hihingi sa iyo ng tulong para pambili ng gamot para sa kanyang sakit sa puso. Gulatin muna siya o pakainin ng isang kilong Lapid's chicharon upang makasigurado kung may sakit nga siya sa puso, o rumaraket lang.

Pisces

Mananalo ka ng isang all-expense-paid trip for two sa El Nido, Palawan courtesy of Sulpicio Lines.

Aries

Mag-ingat sa roommate na emo. Huwag na huwag magbibitiw ng mga pangit na komento patungkol sa My Chemical Romance at sa disipulo nila na Chicosci (Cheeko-skeeh) kung ayaw masaksak sa leeg ng bagong tasa na eyeliner.

Taurus

Sawa na ang mga estudyante mo sa kropek at nilagang mani na itinitinda mo sa classroom.

Gemini

Makakasalubong mo sa isang mall ang iniidolo mong bokalista ng isang sikat na banda. Clue: Sa letrang J nagsisimula ang pangalan ng bokalista, at letter sa letrang C naman ang pangalan ng banda.

Lagi na lang umuulan....

Cancer

Hindi Viagra ang solusyon sa iyong suliranin. Kumuha ng itim na sako at isaklob sa ulo ng katalik.

Leo

Ang pagkatalo ni Federer sa final ng Wimbledon nung Linggo ay 'di nangangahulugang katapusan na ng mundo. Iwasang tumitig sa mga bagay gaya ng labaha, martilyo, sleeping pills at panis na spaghetti. Iwasan ring manakit ng mga batang naglalaro ng jolens at ng mga galang kuting sa 'yong daan pauwi. I-channel na lamang 'yong lakas sa mga bagay na mas mahalaga kaysa sa tennis gaya ng pagtulong sa gawaing bahay, pag-aaral at pagdarasal ng orasyon sa wikang Hebrew.

Virgo

Huwag malungkot kung pakiramdam mo ay hindi ka nababagay o masaya sa kursong kinukuha mo ngayon. Malalaman mong hindi lang ikaw ang may ganitong problema kapag nagtatrabaho ka na sa isang call center.

Libra

Lolooban ng isang holdapper ang iyong sasakyang jeep habang ikaw ay pauwi ng San Mateo mamayang alas-onse ng gabi. Huwag mag-panic. Kuya mo lang 'yan -- nag-o-over time para may pambaon ka bukas.

Scorpio

Isang ‘di inaasahang pangyayari ang magpapalungkot sa’yo ngayong araw. Bukod pa ‘to sa gagawing pagtatapat ng syota mo na meron siyang AIDS.

Capricorn

Matutuklasan mong nawawala ang iyong G-string na kulay dilaw. Sayang at 'yon pa naman ang request sa'yo ng kalaguyo mong si Berto na suotin para sa inyong date mamaya.

Sagitarrius

Hinahanap na ng iyong amo ang kanyang dilaw na G-string na siya mong ipinuslit para sa date niyo ng hardinero ni Mrs. Lomeda na si Berto. Isauli na ito sa lalong madaling panahon kung ang pagbalik sa ahensya ng 'di oras ay wala sa iyong mga plano.